Simpleng solusyon sa komplikadong problema—ito ang tema ng Lakwatsa Tayo For Real Beh (LTFRB). Dahil sa patuloy na oil price hike, hindi maikakailang mas pipiliin na lamang ng masa ang magtrabaho sa kani-kanilang tahanan upang makaiwas ng gastos sa mahal na gasolina. Bunsod nito, nagsilbing inspirasyon ng LTFRB ang paggamit ng kampo ni Baby Macoy Junjun ng dump truck sa campaign rally bilang solusyon sa kakulangan sa pang-masang transportasyon.
Inobatibong dump truck
Umugong ang balita sa social media nang malaman ng publiko na gumamit ng mga dump truck ang kampo ni Baby Macoy Junjun sa Masbate. Ayon sa eksklusibong panayam ng Buwanang Kalat at Katarantaduhan (BUKAKA) kay Baby Macoy Junjun, kandidato para sa pagka-panggulo, natuwa siya noong binigyan ni Ant-Man si Captain America ng water truck para matalo ang kanilang kalaban. Saad niya, “T-ttt-ttruck a-a-aang solusyon habang nangangampanya. No need to go to the the the d-d-debates dahil paulit-ulit lang ‘yung questions. With trucks, nakakahakot kami ng mga tao at nagkakaisa ang madla.”
Kapansin-pansin ang inobasyong ito ng LTFRB, kaya maraming naghimok sa kanilang gayahin ang ginawa ni Junjun. Ayon naman sa TweetTok ni @LenlenBhouszxcQ, katunggali ni Junjun sa pinakamataas na posisyon sa bansa, gamit ang lulan ng dump truck at hindi mga nagpapagamit. Nag-viral ang TweetTok na ito ni @LenlenBhouszxcQ kaya sinikap ng BUKAKA na makapanayam si LTFRB Chairman Fart In Bodega upangmalaman ang opinyon niya at ng ahensya sa usaping ito. Ayon sa kaniya, napabilib siya sa inobasyong ginawa ng kampo ni Junjun, lalo na’t hango raw ito sa cyber truck ni Elon Musk.
Pekeng solusyon
Bagamat maraming pasahero ang sumasang-ayon sa paggamit ng dump truck, maraming mamamayan ang naglabas ng kanilang saloobin tungkol sa naturang programa. Sa panayam ng BUKAKA kay Dina Macuja, isang pasahero na mula sa Monumento, hindi niya planong tangkilikin ang mga dump truck sapagkat kaduda-duda ang programa dahil hango ito sa kampo ng isang tax evader at pamilya ng mga magnanakaw.
Dagdag pa ni Macuja, “Ano ba ‘yang naiisip nila! Dapat ‘yung pondo niyan gamitin sa pagsasaayos sa problema ng mga drayber ng pampublikong transportasyon ng bansa! Mas bagay sa kanilang mga trapo ang dump truck kasi basura sila!”
Bunsod nito, nagsagawa ng kilos-protesta ang Asosasyon ng mga Pasahero para sa Matinong Transportasyon (APAPA-MATA) at ibang dismayadong pasahero sa harap ng LTFRB upang umalma sa paggamit sa mga dump truck.
Sa panayam ng BUKAKA kay John Sapuso, chairman ng APAPA-MATA, iginiit niyang kinakailangan bigyang-pansin ng mga LTFRB ang kinahaharap na suliranin ng mga drayber sa gitna ng pagtaas sa presyo ng krudo. Aniya, hindi dapat pasukin ang isang maduming alternatibo. Dagdag pa niya, mas mainam na tunay na solusyon ang ibigay ng mga politiko at ahensya sa sambayanang Pilipino.
“Etong mga dump truck na ito, ang baho-baho. Nireresolba ba nito ang mga problema ng mga drayber? Napaka-baboy parang mga nakaupo sa pamahalaan,” dagdag ni Sapuso.
Kultura ng respeto at pagkakaisa
Inulan man ng mga batikos ang naturang programa, ipinakita ng mga taga-suporta ng inisyatibang ito ang kanilang pagsulong para sa bagong programang ilulunsad ng pamahalaan. Para sa Asosasyon ng mga Lalalaki at Babaeng Mahilig sa Bano (ALAMANO), nakikita nilang mahalaga ang inilatag na programa ng pamahalaan upang solusyonan ang krisis sa transportasyon at tumataas na presyo ng gasolina.
“Masayang-masaya po kami kasi siyempre dazerv namin na may masakyan. Hinding-hindi namin makakalimutan ang aming mga ngiti, kayo, kami ay. . . ay lubos na nasisiyahan sapagkat kahit pa pambasura ang sinasakyan namin, mahal na mahal kami ng pamahalaan,” wika ni Daryn Yuck, tagapagsalita ng ALAMANO.
Ipinaliwanag ni Yuck na dapat na irespeto ng taumbayan ang programa sapagkat masusi itong pinag-isipan at pinagplanuhan. Para sa kaniya, kahit pa umaalingasaw ang amoy ng mga dump truck, mas mahalaga sa panahon ngayon na maisakay at maihatid ang mga komyuter sa kanilang paroroonan nang walang iniisip na gastusin sa gasolina. Sa inilabas na ulat ng LTFRB, babiyahe ang bagong PUVs sa kahabaan ng Roar Avenue at babagtas mula sa Sabay-Sabay Northbound carousel lane patungong Bhie Bhie Ehm Terminal Exchange sa Pasay.
Upang matulungan ang mga komyuter sa bigat ng pamasahe, magkakaroon ng rollout subsidy para sa mga komyuter na nagkakahalagang Php200 na nakabalot sa mga puting sobre at maaaring makuha sa mga piling araw at oras. Gayundin, bibigyan ng loyalty cards ang mga pasahero at makakuha sila ng bahagi ng balyena gold sa pagkamal nila ng sapat na travel points mula sa pagsakay sa mga dump truck.
Sa panahong patuloy ang paglala ng presyo ng gasolina at krisis sa transportasyon, napakahalaga na maging maagap ang paglalatag ng mga solusyon kahit pa umalingasaw ang asim at anghit ng mga Pilipino. Mahalagang laging handa ang gobyerno sa pagtataguyod ng mga inobatibong ideya sa bawat pagsubok. Tunay na pagkakaisa ang pundasyon ng lahat ng solusyon sa bansa at sa paggamit ng dump truck sabay na hinahakot at hinahatid ng pamahalaan ang mga basura at komyuter patungo sa dapat nilang kalagyan. Kung dati mga taga-suporta lang ang laman ng mga truck, mga ordinaryong komyuter naman ang hahakutin para tunay na muling bumangon ang bayan sa tulong ng pagkakaisa.