SISIMULAN NA ang paglangoy ng mga naka-two piece swimsuit at naka-neon goggles sa nalalapit na pagbubukas ng University Athletic Association of the Philippines (UAAP) Bathtub Swimming Tournament sa Setyembre. Bunsod nito, itatampok ng De La Salle University (DLSU) Green Trunkers ang kanilang talento sa paglangoy sa bathtub sa naturang pangkolehiyong torneo matapos ang kanilang dalawang taong pag-eensayo para dito.
Inobatibong sistema ng pagsasanay
Naniniwala ang Green Trunkers na mahalaga ang hindi paghinga sa ilalim ng katubigan ng bathtub nang mahabang oras upang mapaghandaan ang UAAP. Kaakibat nito, kampante ang mga tagapagsanay ng Green Trunkers na mapauunlad ang talento ng mga estudyanteng manlalangoy. “We have to be innovative at this point of time and use all means and methods possible to keep our swimmers at the peak of their game,” ani Raf Gabora, tagapagsanay ng Green Trunkers, sa eksklusibong panayam ng Buwanang Kalat at Katarantaduhan (BUKAKA).
Sa kabilang banda, hindi naman bago ang konsepto ng mga paligsahan sa loob ng bathtub. Sa katunayan, maraming mga kompetisyon ang naganap sa aplikasyong TikTokToe na tampok ang mga larong patagalan sa ilalim ng tubig o “Last Man Standing” at pagsisid sa iba’t ibang uri ng inumin o pagkain na isinasagawa sa loob ng bathtub.
Ayon sa panayam ng BUKAKA kay Green Trunker Catholic See, magiging inspirasyon ng UAAP ang sistema ng mga trending na bidyo sa TikTokToe na sumisisid ang mga manlalangoy sa iba’t ibang uri ng inumin. Dagdag pa ni Gabora, “I let them do the Last Man Standing challenge in TikTokToe to assess their skills and preparedness for whenever UAAP decides to host competitions for swimming in bathtubs once more.”
Benepisyong dala ng bathtub swimming
Garantisadong may mga benepisyong dala ang pagsisid ng Green Trunkers sa kani-kanilang bathtub. Ayon sa panayam ng BUKAKA kay Green Trunker Lang U. Yin, ligtas ang mga manlalangoy sa UAAP Bathtub Swimming Tournament sapagkat mas mababaw ang lalanguyan nila rito kompara sa baha sa Taft tuwing may mga bagyo. Bunga nito, hindi malulunod ang Green Trunkers sa naturang torneo at hindi rin sila mangangamoy.
Tila benepisyo rin para sa Green Trunkers ang paglangoy sa bathtub dahil binibigyan sila ng Makanya Waters ng buwanang sahod na nagkakahalagang Php30,000. Maliban dito, binibigyan ng Makanya Waters ang Green Trunkers ng iba’t ibang uri ng inumin, tulad ng kape, alak, gatas, suka, at toyo upang magamit nila ito sa ensayo at sa paggawa ng Last Man Standing TikTokToe challenges.
Sa kabila ng kinahaharap na pandemya, mananatiling isang oportunidad para sa mga manlalangoy ang kanilang pagsisid sa bathtub. Nakatutulong ito sa kanilang karera sa UAAP Bathtub Swimming Tournament na tinututukan ng kanilang mga tagahanga sa loob at labas ng DLSU.
Suliraning nakapaloob sa nasabing paligsahan
Inaasahan ng mga namumuno sa paligsahan ang kakayahan ng bawat atleta na bumili ng mamahaling bathtub para sa pag-eensayo at kompetisyon. Gayunpaman, may mga atleta at koponang umalma sa isasagawang paligsahan dahil mahal anila ang bumili ng sariling bathtub. Sa panayam ng BUKAKA kay Jorge Malown, isang nagnanais na sumali sa paligsahan, ibinahagi niyang hindi makamasa ang naturang pasiklaban. Kaya naman, puspusan pa rin ang kaniyang paniniwala na manunumbalik muli ang pagsasagawa ng swimming tournament sa totoong swimming pool.
Sa huli, nananawagan ang Green Trunkers sa pamayanang Lasalyano at iba pang tagahanga ng koponan na patuloy na sumubaybay at mag-iwan ng heart reacts sa kanilang mga live show sa TikTokToe upang mas mapaalab pa ang kanilang determinasyon kaakibat ng mga pagbabago sa kompetisyon.